ఎకానమీ Economy వరల్డ్ ఎకనామిక్ ఫోరమ్ సమావేశాలు

వరల్డ్ ఎకనామిక్ ఫోరమ్ సమావేశాలు

ప్రపంచ ఆర్థిక వేదిక(డబ్ల్యూఈఎఫ్) సమావేశాలు జనవరి 21 నుంచి ప్రారంభం కానున్నాయి.

దేశవిదేశాలకు చెందిన ప్రముఖులు ఇందులో పాల్గొంటున్నారు. ఈ సమావేశాలు ఈ నెల 24 వరకు జరుగుతాయి. ఈ సంస్థ మానవాళి ఎదుర్కొంటున్న ఆర్థిక, సామాజిక సమస్యల పరిష్కారానికి కృషి చేస్తోంది. ప్రభుత్వ, ప్రైవేట్ భాగస్వామ్యం ద్వారా ప్రపంచ ఆర్థికాభివృద్ధికి తోడ్పడుతున్న డబ్ల్యూఈఎఫ్ గురించి తెలుసుకుందాం...

చరిత్ర: 

వరల్డ్ ఎకనామిక్ ఫోరమ్‌ను యూరప్ వ్యాపారవేత్తలు 1971లో ఏర్పాటు చేశారు. యూరోపియన్ కమిషన్, యూరోపియన్ ఇండస్ట్రియల్ అసోసియేషన్ల ఆధ్వర్యంలో స్విట్జర్లాండ్‌లోని దావోస్‌లో సమావేశమై డబ్ల్యూఈఎఫ్‌కు శ్రీకారం చుట్టారు. 1987 వరకు దీన్ని యూరోపియన్ మేనేజ్‌మెంట్ ఫోరమ్‌గా వ్యవహరించేవారు. ఆ తర్వాత డబ్ల్యూఈఎఫ్‌గా మార్చారు. ఆర్థిక వ్యవస్థపై యూనివర్సిటీ ఆఫ్ జెనీవాకు చెందిన ప్రొఫెసర్ క్లాజ్ స్క్వాబ్ రచించిన పుస్తకం ఈ సంస్థ ఏర్పాటుకు ప్రేరణగా నిలిచింది. మొదట యూరప్‌కే పరిమితమైన డబ్ల్యూఈఎఫ్ అనంతరం అంతర్జాతీయ సంస్థగా ఎదిగింది. ఇది పూర్తిగా నాన్ ప్రాఫిట్ ఫౌండేషన్.

సభ్యులు: 

డబ్ల్యూఈఎఫ్‌లో 1000 మంది సభ్యులు ఉంటారు. ప్రపంచంలోని ప్రఖ్యాత వ్యాపారవేత్తలకు, కార్పొరేట్ సంస్థల అధిపతులకు ఇందులో సభ్వత్వం కల్పిస్తారు. ప్రభుత్వ, ప్రభుత్వేతర సంస్థల నుంచి వచ్చే నిధులతో డబ్ల్యూఈఎఫ్ కార్యకలాపాలు కొనసాగుతాయి. వీటిని ఫౌండేషన్ బోర్డు పర్యవేక్షిస్తుంది. ప్రతిఏటా దాదాపు 6 ప్రాంతీయ సమావేశాలు వివిధ దేశాల్లో నిర్వహిస్తారు. ఏటా ఒక్కో దేశంలో వార్షిక సమావేశం ఏర్పాటు చేస్తారు.

లక్ష్యాలు: 

ఆర్థిక సంక్షోభాలను ఎదుర్కొనేందుకు వ్యూహాలను రూపొందించడం

సామాజిక, ఆర్థిక రంగాల్లో సమస్యలను పరిష్కరించడం

ప్రపంచ ఆర్థికాభివృద్ధికి, మానవ ప్రగతికి సూచనలు చేయడం

పర్యావరణ పరిరక్షణ

లింగ వివక్షను రూపుమాపడం

ఆర్థిక అసమానతలను అంతం చేయడం

ఆరోగ్యంపై ప్రజల్లో అవగాహన పెంచడం

మానవ హక్కులను కాపాడడం

ప్రకృతి విపత్తులను ఎదుర్కోవడం, బాధితులకు బాసటగా నిలవడం

విద్యార్థులు, నిరుద్యోగుల్లో నైపుణ్యాలను పెంచేందుకు వర్క్‌షాప్‌ల నిర్వహణ

అవినీతిని నిర్మూలించి, పరిపాలనలో పారదర్శకతను పెంచడం

మరిన్ని సంగతులు 

ఏర్పాటు: 1971 జనవరి 

అధికార భాష: ఆంగ్లం 

మ కోలొనీ, స్విట్జర్లాండ్ 

వ్యవస్థాపకుడు, ఎగ్జిక్యూటివ్ చైర్మన్: క్లాజ్ స్క్వాబ్